សម្ដីគ្រូបង្វឹក
លោក ទេព ឡុងរចនា
លោក ទេព ឡុងរចនា បានបង្ហាញចំណាប់អារម្មណ៍ថាក្រុមរបស់លោកនឹងប្រឹងឱ្យអស់សមត្ថភាពដើម្បីរកជ័យជម្នះឱ្យបានក្នុង៧ប្រកួតដែលនៅសល់ នាពេលខាងមុខនេះ។ នេះជាការតាំងចិត្តមួយ ដើម្បីឱ្យក្រុមទ័ព អាចមានឱកាសលើកពានលីគកំពូលកម្ពុជាបានសម្រេច។
ចំណែកឯលោក ប្រាក់ សុវណ្ណារ៉ា វិញ បាននិយាយដែរថាបន្ទាប់ពីជោគជ័យក្នុងការដាក់គោលដៅ៣ប្រកួតជុំទី២ យកឱ្យបាន៩ពិន្ទុមក លោកបានដាក់គោលដៅមួយទៀត ដោយ៣ប្រកួតបន្ទាប់គឺត្រូវយកឱ្យបានយ៉ាងតិច៧ពិន្ទុ។ នេះមានន័យថាប្រកួតជាមួយទ័ព ក្រុមបឹងកេតអង្គរមិនអាចចាញ់បានទេ ដោយអាចត្រឹមស្មើនិងឈ្នះតែម្ដង។
លោក ប្រាក់ សុវណ្ណារ៉ា
ជើងកីឡាករ
ក្រសួងការពារជាតិ នឹងអវត្តមានកីឡាករ២នាក់គឺ ភួង សុខសាណា រងរបួសរហូតចប់រដូវកាលនិងខ្សែការពារ ខែក ខេមរិន្ទ ដែលជាប់កាតលឿង២ដង។ កីឡាករជនជាតិកូរ៉េខាងជើងទាំង៤នាក់ បានហាត់សមបានយ៉ាងល្អសម្រាប់ត្រៀមប្រកួតនេះ ប៉ុន្តែលោក ទេព ឡុងរចនា សុំមិនបង្ហាញការយល់ឃើញនោះទេ។
បឹងកេតអង្គរ ប្រកួតមួយនេះពេញជើងល្អណាស់ ដោយមិនមានម្នាក់ណារបួសនោះទេ ដូច្នេះជម្រើស១១នាក់ដំបូងរបស់លោក ប្រាក់ សុវណ្ណារ៉ា អាចជ្រើសរើសតាមចិត្តបាន។
ប្រវត្តិជួបគ្នា
កាលពីជើងទីមួយកន្លងទៅ នៅពហុកីឡដ្ឋានជាតិ ក្រុមក្រសួងការពារជាតិបានយកឈ្នះក្រុមបឹងកេតអង្គរដោយលទ្ធផល ២-១ ក្នុងការប្រកួតលីគកំពូលកម្ពុជា។ ខណៈដែលរដូវកាលនេះដូចគ្នាក្នុងពានរង្វាន់ Hun Sen Cup ទ័ពនៅតែអាចរកឈ្នះក្រុមបឹងកេតបានដដែល ដោយកាលនោះឈ្នះក្នុងលទ្ធផល ២-០ នៅវគ្គសន្សំពិន្ទុក្នុងពូល ។ ចំពោះប្រវត្តិសរុបវិញ ប៉ះគ្នា១១ដង ទ័ពឈ្នះបានតែ៣ដងទេ ក្រៅពីនេះស្មើ២ ចាញ់៦ដង។
សូមបញ្ជាក់ថាក្រៅពីមួយគូខាងលើនេះទៅ នៅល្ងាចនេះក៏មានមួយគូទៀតដែលប្រកួតគ្នាដែរគឺក្រុម Cambodian Tiger ប៉ះជាមួយក្រុមស៊ីម៉ាក់នៅកីឡដ្ឋាន Western នាវេលាម៉ោង៣:៣០នាទី៕
ប្រភព : SABAY
Post a Comment