តារាកំប្លែងនាយ ពាក់មី បានថ្លែងប្រាប់សារព័ត៌មានក្នុងឱកាសសម្ភោធរឿង “សួស្តីលោកគ្រូកំលោះ” នៅព្រឹកមិញថា ផ្ទះដែលកំពុងសាងសង់ឲ្យឪពុកម្ដាយនៅស្រុកកំណើតក្នុងខេត្តព្រៃវែង គឺលោកជាអ្នករ៉ាប់រងម្នាក់ឯងទាំងអស់ ទាំងប្រាក់ គំរូផ្ទះ ហើយពេលខ្លះ លោកក៏បានបញ្ចេញទឹកដៃលោកផ្ទាល់ ដោយចំណាយដល់ទៅជាង១០ម៉ឺនដុល្លារហើយ តែអត់ទាន់ចប់ទេ។
លោក ចែម ចាន់ដារ៉ា ហៅ ពាក់មី បានបន្តថា ផ្ទះដែលសាងសង់ជូនឲ្យឪពុកម្ដាយនោះចំណាយអស់ប្រហែល ១០ ម៉ឺនដុល្លារហើយ តែមិនទាន់រួចរាល់ ព្រោះមិនទាន់បានទិញសម្ភារៈផ្សេងៗដាក់ទេ។ “ផ្ទះធ្វើរួចហើយនៅតែទិញគ្រឿងសង្ហារិម និងធ្វើសួនច្បារប៉ុណ្ណោះ”។
ប្រធានក្រុមតារាកំប្លែងប្រចាំទូរទស្សន៍ CTN រូបនេះ បានបន្តថា ផ្ទះធំទ្រនំខ្ពស់នោះ រស់នៅតែឪពុក និងម្ដាយលោកតែប៉ុណ្ណោះ។ ពាក់មី បញ្ជាក់ពីមូលហេតុដែលលោកត្រូវធ្វើផ្ទះជូនឪពុកម្ដាយ ព្រោះទាន់នៅមានឱកាសដែលអាចតបស្នងសងគុណអ្នកទាំងពីរវិញបាននៅពេលនេះ ។ “ខ្ញុំមិនដឹងថាអាចមានលទ្ធភាពរកប្រាក់បានដល់ពេលណាទេ តែពេលនេះ ខ្ញុំមានឱកាសរកប្រាក់ចំណូលបាន ដូចនេះចង់សងគុណគាត់ឲ្យហើយទាន់គាត់នៅរាងក្មេងៗ។”
បុរសកូនពីរខាងលើបានបញ្ជាក់ថា ទង្វើបែបនេះលោកមានបំណងបី ទី១ “ឲ្យឪពុកម្ដាយបានសប្បាយចិត្ត ទី២ មានកូនល្បីកូនមានលុយកាក់ជូនចឹងទៅគាត់មិនពិបាកដើររកស៊ី ទី៣ គាត់អាចមានមុខមានមាត់។”
ជាចុងក្រោយលោកបញ្ជាក់ថា ទាំងការចេញម៉ូដ រាល់ការគ្រប់គ្រងការដ្ឋានគឺលោកជាអ្នកធ្វើផ្ទាល់ មិនត្រឹមតែប៉ុណ្ណោះចំណែកខ្លះក៏ម្ចាស់បទ “ឆ្កែក្រុង ឆ្កែស្រែ” គឺជាលោកធ្វើដោយដៃលោកផ្ទាល់៕
ប្រភព : SABAY
Post a Comment