លោក ជ័យ សម្បត្តិ អ្នកដឹកនាំរឿងនេះបាននិយាយថា លោកត្រូវការតួជាច្រើននាក់ ហើយមិនសំដៅតែចំពោះអ្នកមានបទពិសោធន៍នោះទេ ព្រោះលោកក៏ចង់ផ្ដល់ឱកាសសម្រាប់យុវវ័យជំនាន់ក្រោយមាន ដែលទេពកោសល្យសិល្បៈពិតប្រាកដផងដែរ។
“ការសម្ដែងមិនមែនជារឿងងាយទេ តែពួកខ្ញុំសុខចិត្តហត់ ធ្វើយ៉ាងណាឱ្យការសម្ដែងរបស់ពួកគាត់ទស្សនិកជនទទួលយកបាន ទោះមិនធ្លាប់មានបទពិសោធន៍ក៏ដោយ”។ លោក ជ័យ សម្បត្តិ ថ្លែងមកកាន់ Sabay មុននេះ។
អ្នកដឹកនាំរឿងក្នុងកម្មវិធី” ឡូយ៩” និងកម្មវិធី “ស្នេហ៍៩” រូបនេះបានបន្ថែមថា ដំណើរការធ្វើតេស្តសាកល្បងសមត្ថភាពតួមានរយៈពេលពេញមួយខែសីហាតែម្ដង ដែលការជ្រើសរើសនេះ នឹងត្រូវប្រព្រឹត្តទៅយ៉ាងម៉ត់ចត់បំផុត ព្រោះសាច់រឿង ត្រូវការតួអង្គនីមួយៗមានសមត្ថភាព និងជំនាញខ្ពស់ ទើបអាចបំពេញតាមរូបារម្មណ៍តួអង្គក្នុងសាច់រឿងបាន។ ដូច្នេះហើយ បើបេក្ខជនទាំងអស់មានចំណាប់អារម្មណ៍អាចទាក់ទងក្រុមការងារ ដើម្បីទៅយកសាច់រឿងមើលជាមុនចាប់ពីពេលនេះដោយទាក់ទងតាមរយៈលេខ ០២៣ ៦៣ ២៣ ៣៦៣ ។
ជ័យ សម្បត្តិ បញ្ជាក់ថា បន្ទាប់ពីអានប្រលោមលោករឿង “ស្រទន់មន្តស្នេហ៍” រួចមក លោកបានសម្គាល់ឃើញចំណុចពិសេសជាច្រើនក្នុងសាច់រឿង ដូច្នេះហើយ លោកជឿជាក់ថា ពេលផលិតចេញវីដេអូភាគចាក់ផ្សាយលើកញ្ចក់ទូរទស្សន៍ខាងមុខ នឹងកាន់តែមានការចាប់អារម្មណ៍ខ្លាំងមិនខាន។
លោកអះអាងម្យ៉ាងទៀតថា ក្រុមការងាររបស់លោកដែលចូលរួមក្នុងដំណើរការថតរឿងនេះ មួយចំនួនមានបទពិសោធន៍មកពីក្រៅប្រទេសទៀតផង ហើយសុទ្ធសឹងតែធ្លាប់ធ្វើការលើវិស័យភាពយន្តជាមួយគ្នាទៀត ជាហេតុធ្វើឱ្យលោកកាន់តែមានទំនុកចិត្តថា “ស្រទន់មន្តស្នេហ៍” ពេលផលិតចេញមក នឹងមានគុណភាពខ្ពស់ មានភាពទាក់ទាញ ត្រូវចិត្តមិត្តៗយុវវ័យ ក៏ដូចជា ទស្សនិកជនទាំងឡាយ៕
ប្រភព : SABAY
Post a Comment