មិនថាបុគ្គលិកការិយាល័យ ឬក៏មនុស្សទូទៅទេ អ្នកប្រាកដជានឹងត្រូវប្រឈមមុខនឹងពេលណាមួយដែលត្រូវដឹកនាំកិច្ចប្រជុំ ឬដឹកនាំក្រុមពិភាក្សាផ្សេងៗ ជាពិសេស សម្រាប់សហគ្រិន ការទំនាក់ទំនងគឺមានសារៈសំខាន់ខ្លាំងណាស់។
ហេតុនេះ វាជារឿងសំខាន់ណាស់ ដែលត្រូវប្រុងប្រយ័ត្នឲ្យបានម៉ត់ចត់ លើពាក្យគ្រប់ម៉ាត់ ដែលអ្នកត្រូវនិយាយចេញមក ព្រោះភាពជាអ្នកដឹកនាំ តម្រូវឲ្យមានវិន័យពាក្យសម្តីខ្ពស់។
តោះ! តាមដានគន្លឹះមួយចំនួន ខាងក្រោមនេះទាំងអស់គ្នា ដើម្បីអភិវឌ្ឍន៍ខ្លួនឯងឲ្យក្លាយជា មនុស្សម្នាក់ដែលមានអំណាចក្នុងការប្រើប្រាស់ពាក្យសម្តី៖
១. ស្វែងយល់ភាសារបស់អ្នកដឹកនាំ
ភាសារបស់អ្នកដឹកនាំ ខុសពីភាសារបស់មនុស្សធម្មតាឆ្ងាយណាស់។ រាល់ពាក្យដែលនិយាយចេញមកពីអ្នកដឹកនាំ គឺបង្ហាញពីបច្ចុប្បន្នកាល អនាគតកាល ពន្យល់ណែនាំភាពស្មុគ្រស្មាញ បង្ហាញពីការតាំងចិត្ត ដើម្បីប្រឈមមុខនឹងការលំបាក លើកទឹកចិត្តឲ្យសម្រេចគោលដៅ -ល-។ ហេតុនេ អ្នកដឹកនាំនីមួយ ៗមានទំនួលខុសត្រូវខ្ពស់ណាស់ ព្រោះឥទ្ធិពលរបស់ពួកគេ គ្របដណ្តប់លើអង្គភាពទាំងមូល។
ក្នុងនាមជាអ្នកដឹកនាំ អ្នកត្រូវតែចេះប្រើប្រាស់ពាក្យសម្តីឲ្យបានប្រុងប្រយ័ត្ន ពោរពេញដោយភាពជាក់លាក់ រឹងមាំ និងបង្កប់ទៅដោយអំណាច។
២. ដឹងពីគោលបំណង
មេដឹកនាំភាគច្រើននិយាយគ្មានក្បាលកន្ទុយ ដោយសារតែពួកគេ មិនដឹងមិនយល់ពីអ្វីដែលពួកគេចង់បាន (គោលបំណង)។ មុនពេលដែលអ្នកនិយាយ (ជាលក្ខណៈផ្លូវការ ឬមិនផ្លូវការក៏ដោយ) អ្នកត្រូវសួរខ្លួនឯងថា «ហេតុអ្វីបានជាអ្នកមកកាន់ទីនេះ? តើអ្នកចង់បានអ្វី?»
ប្រសិនបើនៅក្នុងអង្គភាពផ្សេងៗ គេប្រាកដជាមានគម្រោង និងកម្មវត្ថុនៃសន្ទរកថា រួចជាស្រេចសម្រាប់អ្នក ហេតុនេះអ្នកនឹងមិនពិបាកគិតទេ អ្នកគ្រាន់តែនិយាយពីតម្រូវការ និងគោលដៅដែលបង្ហាញស្រាប់ប៉ុណ្ណោះ។ ករណីដឹកនាំការពិភាក្សាផ្សេងៗ ប្រសិនបើអ្នកមិនទាន់ច្បាស់ពីអ្វីដែលត្រូវនិយាយទេ យកល្អអ្នកគួរអង្គុយស្ងៀមសិន រហូតទាល់តែគិតរួចរាល់ បែបនេះទើបមិនធ្វើឲ្យមានបញ្ហាពេលកំពុងនិយាយ។
៣. កុំពន្លើសពេក
ការដែលអ្នកប្រើពាក្យមួយចំនួនដូចជា «អស្ចារ្យបំផុត» «ល្អមែនទែន» «ល្អឥតខ្ចោះ» និងពាក្យដែលមានន័យខ្លាំងៗផ្សេងទៀតចូលទៅក្នុងការសន្ទនា នោះអ្នកស្តាប់អាចនឹងគិតថា មិនទំនង និងមិនគួរឲ្យទុកចិត្តឡើយ។ ការប្រើពាក្យខ្លាំងៗពេក គឺដូចជានិយាយប្រាសចាកពីការពិតដូច្នោះដែរ។ គ្មានអ្វីដែលល្អអស្ចារ្យ ឬល្អឥតខ្ចោះគ្រប់តែពេលនោះទេ ហេតុនេះកុំនិយាយយកតែល្អស្តាប់ពេកឲ្យសោះ។ ក្នុងនាមជាមេដឹកនាំម្នាក់ ភាពស្មោះត្រង់ និងភាពត្រឹមត្រូវ ជារឿងសំខាន់ណាស់ ដូចនេះកុំប្រើពាក្យពន្លើសពេក ព្រោះអ្នកស្តាប់នឹងមិនជឿ ហើយបែរជាមានការសង្ស័យ មកលើអ្នកវិញថែមទៀត។ ជំនួសដោយការនិយាយពាក្យខាងលើ អ្នកគួរបង្ហាញសកម្មភាព និងប្រតិកម្មជាភាសាសាមញ្ញដូចជា “ល្អ” ឬត្រឹម “ល្អណាស់” គឺប្រសើរហើយ។
៤. ចៀសវាងប្រើពាក្យ “ប៉ុន្តែ”
“ប៉ុន្តែ” គឺជាឃ្លាភ្ជាប់ ដែលមានន័យផ្ទុយពីប្រយោគមុន។ អ្នកដឹកនាំភាគច្រើន មានទម្លាប់និយាយដំណឹងល្អៗ ហើយបែរជាបន្តពាក្យថា “ប៉ុន្តែ” ឬ “ទោះជាយ៉ាងណាក៏ដោយ” ជាមួយនឹងដំណឹងអាក្រក់ផ្ទុយពីប្រយោគដំបូងទៅវិញ។ ដើម្បីចង់ទាក់ទាញអារម្មណ៍ទស្សនិកជន អ្នកត្រូវចៀសវាងយុទ្ធសាស្រ្តនេះ ព្រោះពួកគេនឹង មិនចូលចិត្តពីរបៀបដែលអ្នកនិយាយល្អហើយ ស្រាប់តែប្រែជាអាក្រក់ទៅវិញ។ ការដែលនិយាយបែបនេះ ធ្វើឲ្យបរិយាកាស ប្រែជាអាប់អួរមិនខានទេ។
៥. ធ្វើខ្លួនឲ្យដូចជាមនុស្សធំ
ក្មេងៗ ឬយុវវ័យ ចូលចិត្តនិយាយពាក្យថា “ចឹង” “ត្រូវអត់” ជាដើម ហើយប្រសិនបើអ្នកជាអ្នកដឹកនាំវិញនោះ សូមកុំប្រើពាក្យអស់ទាំងនេះឲ្យសោះ។ កុំបញ្ចប់ប្រយោគរបស់អ្នកដោយនិយាយថា “ដឹងនៅ” “ត្រូវអត់” ឲ្យសោះ ព្រោះអ្នកស្តាប់នឹងគិតថា អ្នកមិនច្បាស់មិនប្រាកដ ពីអ្វីដែលនិយាយចេញពីមាត់ខ្លួនឯងផងហ្នឹង! ជំនួសពាក្យទាំងនោះ អ្នកត្រូវនិយាយឲ្យដូចជាលក្ខណៈផ្លូវការ និងមានទំនុកចិត្តខ្ពស់។
៦. ស្តាប់ផង
អ្នកដឹកនាំល្អ ប្រាកដជាដឹងថាការទំនាក់ទំនង មិនមែនមានតែភាគីម្ខាងនោះទេ។ ដូចនេះប្រសិនបើអ្នកចង់បាន ការគោរព និងការកោតសរសើរពីអ្នកនៅក្រោមបង្គាប់នោះ អ្វីដែលសំខាន់បំផុតគឺ អ្នកត្រូវតែចេះស្តាប់គេផង។ បន្ទាប់ពីអ្នកនិយាយរួច អ្នកអាចធ្វើការសាកសួរ ការផ្តល់មតិពីអ្នកក្រោមបង្គាប់របស់អ្នក។ នៅពេលដែលពួកគេកំពុងនិយាយ អ្នកគួរតែកត់ចំណាំទុក ដើម្បីឲ្យពួកគេដឹងថាអ្នកពិតជាយកចិត្តទុកដាក់ពិតមែន។ ត្រូវចងចាំថា មិនមែនឲ្យតែអ្នកដឹកនាំ គឺត្រូវតែនិយាយរហូតនោះទេ អ្នកដឹកនាំពិតប្រាកដ គួរបើកសិទ្ធិអនុញ្ញាតឲ្យអ្នកដទៃនិយាយផងដែរទើបប្រសើរ៕
ប្រភព : KHMERLOAD.COM
Post a Comment